User:Thian Nei Thang

SAIMUN KHUA IHSIN TLAWNGKAI HMAISABIK TU PAWL

(1)1892 kum ah British Mirang pawl cu Chinram,Falam Peng,Saimun khua ah an thleng. Saimun khua an ṭhlen tikah Saimun khua cu Khuangli Miuk Pu No Al ih uknak sungah an ret. Khuangli khua cu hlanlai ihsin thok Saimun khua cun kan Pa vekin, kan rak nei.

(2)Cuti in Khuangli Uknak sungih a ummi Fa le nau pawl hrangah ti in, British mirang pawlin,.……kum ah Khuangli khua ah Kumpi Tlawng an rak phuan sak.Cuih tlawng ahcun Khuangli uknak sungih a ummi, khawtin ihsin Lal Uk fa le nau pawl le tlawngkai duhtu pawl cun tlawng an rak kaikhawm hai.

(3)Cuih Khuangli Tlawng ahcun Saimun khua ihsin khal an rak kai ve.Cuih tlawngkaitu pawlih tlawngkainak ding hrangih a ṭul mi Paisa le cemliam ding mi, ei le in hrang pawl cu Saimun khua tlangpi in,an tumsak ṭheh.

(4)Culai ah Saimun khawsung ihsin Lal Uk fa le nau le tlawngkai a duhtu pawl cu, khawmi hnih tlawngkai dingin a fial in, an fialcop ih cuti in,Khuangli tlawng ahcun Saimun khua aiawh in,tlawngkai mi kha an rak si.Cuti ih Saimun khua aiawh in, tlawngkai mi an rak si ruangah an ṭul thil mi ziangkim cu Saimun tlangpi in an tumsak ṭheh. si.Cun thlatin an ei le in ding le an suncaw ding tiang hman, Saimun tlangpi cun Khuangli khua ah Laisin an phurhsak ṭheu a si.

(5)Cuih Khuangli Kumpi tlawngah Saimun khua ihsin Tlawng rak kai hmaisa biktu pawl cu -

(a)Pu Tha Zik (b)Pu Con Thawng pawl an si.

An hnih cu Saimun khua ihsin Khuangli tlawngkai hmaisa biktu le Phun(4) ong hmaisa biktu pawl khal an si.

(6)Cun a hnuah Rev.E.Hlawn Piang ih Pa Rev.Hang Thawng khal cu Khuangli tlawngah Saimun khuami pawlin,Saimun khua aiawh in,a vei(2)nak tlawng an rak kai ter. Culai ah Saimun khua ah tlawngkai duhtu cu minung an um lo tuk ti a si. Tlaengkai dingah khuasung tlangsuak Upa pawlin, a hawl in an hawl.Tlawngkai ding hnakin, Loothlo hnaṭuan sawn kha an hril sawn deuh hmang.

(7)Cuti in 1931 kum a ṭhlen tikah Lunglui kual sungih a ummi khua le ram pawl cu Khuangli khua ah tlawngkai sukso fehnak Lamzin a hlatuk deuh ruangah, Lunglui Khual sung ih a ummi, khua le ram pawl hrangah British kumpi in, Khawpual le Bocung karlak Ciakrawn ah tlawng ṭhen pakhat cu an phuansak sal. Cuih tlawng cu "Ciakrawn tlawng" tin an ko ih Rev.Hang Thawng khal cu Khuangli tlawngah kum(1) a kai ṭhehhnu 1931 kum Aungust thla ah cuih Ciakrawn tlawng ahcun a thawnsal ve a si. Cuih Ciakrawn tlawng ahcun Saimun khua ihsin Tlawngkai hmaisa biktu pawl cu-

(a)Rev.Hang Thawng (b)Pu Ṭial Lian (c)Pu Sa Tin Khuai (d)Pu Than Sum ect……… le pawl an si.

(8)Cuih a dot ah Saimun khua ihsin " Khawpual Ciakrawn" tlawng rak kaisaltu pawl cu -

(a)Pu Pau Khum (b)Pu Khua Za Kham (c)Pu Lal Khaw Piang ect………pawl an si.

Cupawl cu Khuangli tlawngkai lai vek thotho in,Saimun tlangpi pawlin,Saimun khua aiawh in, tlawng kaiter mi an rak si.An tlawngkainak hrangih cemliam mi le an ṭul mi, ei le in ,an rawlsuannak ding zanthing tiang cu Saimun Tlangpi in, Ciakrawn ah an phursak ṭheu asi.Culai ih tlawng kaitu pawl cu zohman tlawngkai duhtu an um lo tikah ziangkim Saimun Tlangpi in,a lak rori in cawm ṭheh kha a si.

(9)Cuti in Saimun khua cu fimthiam zirnak lamah khawnu/khawpa pawlin, duhsak zetin an zuam vivo ruangah 1949 kum a kim tikah, American Missionary Nelson Siangbawi in, Saikah Khawmpi ihsin,Khawmpi zawhtu hmuahhmuah hen ah " Missionary" tlawng phuan duhtu nan um maw? nan um a sile,kan lo bawm ding " tin an titik ah Saimun khua ihsin khawmpi a rak zawh vetu Rev.Hang Thawng le Saya Pau Khum cun Saimun khua in kan phuan duh tin, an kut an thir ih cutikah 1950 kum ah Saimun khua ah " American Baptist Mission Tlawng" an phuan thok a si.Cuih an phuannak Tlawnginn cu tu ih Baptist Quater saknak ah hmun kha a si. Culai ah Saimun khua ah Khrihfa cu Baptist lawng a um lai.Khawhhran dang cu a um hrih lo.

(10)Asinan cuih American Baptist Missionary- Saimun tlawng ahcun Saimun khua sung ihsin minung tampi cun Tlawng an rak kai a si. Cuih Mission tlawngih tlawngkai hmaisa biktu pawl cu -

(a)Pu En Thawng (a baang sal) (b)Pu Zun Kham ( a baang sal) (c)Pu Sang Cung( a bang sal (d)Pu Zing Khuai (e)Pu Thang Ling (d)Pu Sawm Thang ( kum-85)a damlai pawl a si.

Cuih sung ihsin Pu Zing Khuai, Pu Thang Ling le Pu Sawm Thang tei pa(4)pawl cu Mission tlawng ihsin Cozah (kumpi) tlawng an her tiang, a dotdot in tlawngkai pehtu an si.Cupawl cu Saimun Mission Tlawng le Cozah(Kumpi) tlawng ihsin Phun(4) thleng hmaisa biktu pawl an si.

(10)Cuih pawl a dot ah Saimun Mission tlawngih Tlawngkaitu pawl cu - Pu Than Kim le pawl an si.Pu Than Kim le cu Saimun Mission tlawngah Phun(I)tiang an thleng. Cun Saimun Mission tlawngkai hmaisa biktu pawl cu Saimun Mission tlawngah phun (II)tiang an rak thleng man a si.

(11)Cun 1949 kum Mission tlawng kan ngah hnu ah Saimun Baptist Biakinn ah kum(2)an rak kai ih cuihhnu 1952 kum ah Saimun Baangla Innpi ah, kum(1)an rak kai .Cuih Bangla Innpi ah an kai sungah Bangla Innpi thlangah Kumpi cozah tlawnginn thar an sakih cuti in 1953 kum ahcun, cuih an sak mi Kumpi Tlawng Innpi thar ahcun an Cozah tlawng an kai thok a si. Zirhtu Saya cu Pu Pau Khum a si. Cuih cozah tlawng ahcun Pu Sawm Thang,Pu Zing Khuai le Pu Thang Ling pawl cu Phun(III)in an rak kai ih, Pu Than Kim le pawl cu Phun(II)in an rak kai.

Cuṭheh in (1) Pu Hau Tin Thang,(2)Pu Hau Pum, (3)Pu Kap Kam,(4)Pi Khaw Nei Thiam le (5) Pu Khuang Tin Sang pawl cu Phun(I) invan rak kai a si.Cupawl cu Mission tlawng an kai lo nan, Cozah tlawng kan ngah pek te ih Cozah tlawngah Phun(1)kai hmaisa biktu pawl a si. Cuti in hreekkhat pawl cu baang saltu khal tampi a um. Cun Pi Khaw Nei Thiam cu Saimun khua Minu(Nunau)lak sung ihsin Phun(4)thleng hmaisa biktu Pakhat a si.Cun Saimun Cozah kumpi tlawng kan ngah hnu ih Phun(4) ong hmaisa biktu Mipa cu Pu Than Kim a si.

Cumi cu Saimun khua sung ihsin fimthiam zirnak lam ih Tlawng rak kai hmaisa biktu Khuahlan kan Saimun Pipu pawlih a liamcia thuanthu tawi zingzoi sal mi a si.Famkim lo nak le hrelh mi tete a um a sile, rem beet vivo sal ding kan si.

Hmailam ah Saimun thangthar leng le val pawlin " Pipu Nun hlun zoh kirsal in, santhar nunṭha kan sersuak thei ding kha a thupizet mi" a si.

1. Sirhsan mi Thu

(1)aimun American Missionary Tlawng File (2)Pa Khuang Tin Sang ih simmi (3)Piannak Saimun (Pu Sang Tin Khuai) (4)Bulpaak zingzoinak

Salai Thiang Nei Thang (2023 June 28) Chinram,Falam Peng,Saimun