User:Reynaldo E. Corsino

SAANDA A TIMMUBO Daniw ni: REYNALDO ESTRADA CORSINO Impablaak ti BANNAWAG idi Agosto 18, 1997 Napadayawan : Avant Grande Literary Awards GUMIL 1998

Sikikitaak idiay bangkag iti maysa nga aldaw, A nagbalin a sanikuak iti naminsan Dagiti ballat naidasayda iti daga, Ket ti tanap inabbonganda.

Ti pagtaengan a dimmakelan dagiti annakko, A nagtaenganda iti adu a tiempo Ngem maimatangak ita ti pannakarpuogna, Ken panagarubos adu a lulua.

Sikikitaak iti kararuak iti masya nga aldaw, Tapno birokek met ti idadakkelna. Addaan rangat ken sisiit sadino man… Dagiti bukel a naiwarsi saanda a timmubo.

Bayat ti panaglabas adu a tawen A saanko nga inkaskaso ti kinapategna Uray nasirnaat ti tangatang saanak a timmangad Ta ditoy daga adut’ pagapitak…

Dagiti tawen a dinaddadaelko, ay, napukawdan, Dagiti aldaw a diak malagipen, No mabalin koma laeng nga isublik ida Ngem timmayabdan kas pangen ti kannaway…